२०८३ कार्तिक १३ गते शुक्रवार
२०८३ कार्तिक १३ गते शुक्रवार
.gif)
काठमाडौं । चालु आर्थिक वर्ष २०८२\८३ को पहिलो १० महिना (साउन-वैशाख) मा नेपालको वैदेशिक व्यापारमा वृद्धि भएको छ । निर्यातको तुलनामा आयातको वृद्धिदर उच्च हुँदा मुलुकको व्यापार घाटा पनि करिब १५ प्रतिशतले बढेको छ ।
भन्सार विभागले सार्वजनिक गरेको १० महिनाको तथ्याङ्कअनुसार यस अवधिमा नेपालको कुल वैदेशिक व्यापार १४.७५ प्रतिशतले बढेर १९ खर्ब ४१ अर्ब ६० करोड रुपैयाँ पुगेको छ । गत आर्थिक वर्ष २०८१\८२ को सोही अवधिमा कुल व्यापार १६ खर्ब ९२ अर्ब ९ करोड रुपैयाँ बराबरको थियो ।
चालु आर्थिक वर्षको १० महिनामा १६ खर्ब ९२ अर्ब ६४ करोड रुपैयाँ बराबरको वस्तु आयात भएको छ । यो गत वर्षको सोही अवधिको तुलनामा १४.८२ प्रतिशतले बढी हो । गत वर्ष सोही अवधिमा १४ खर्ब ७४ अर्ब १८ करोडको आयात भएको थियो ।
निर्यात १४.२५ प्रतिशतले वृद्धि भई २ खर्ब ४८ अर्ब ९६ करोड रुपैयाँ पुगेको छ । गत वर्ष सोही अवधिमा २ खर्ब १७ अर्ब ९१ करोडको निर्यात भएको थियो। यद्यपि, आयातको तुलनामा निर्यातको आयतन अत्यन्तै न्यून रहेको तथ्याङ्कले देखाउँछ ।
आयातमा भएको उच्च वृद्धिका कारण मुलुकको व्यापार घाटा १४.९२ प्रतिशतले बढेर १४ खर्ब ४३ अर्ब ६७ करोड रुपैयाँ पुगेको छ । नेपालको कुल वैदेशिक व्यापारमा आयातको हिस्सा ८७.१८ प्रतिशत पुगेको छ भने निर्यातको हिस्सा घटेर १२.८२ प्रतिशतमा सीमित भएको छ ।
© 2026 All right reserved to khabarcnter.com | Site By : Sobij
