काठमाडौ । चालु आर्थिक वर्ष २०८३/८४ को पहिलो त्रैमासमा सञ्चालनमा रहेका २० वाणिज्य बैंकले कुल १९ अर्ब ११ करोड रुपैयाँ खुद नाफा आर्जन गरेका छन्। बैंकहरूले सार्वजनिक गरेको अपरिष्कृत वित्तीय विवरणअनुसार अधिकांश बैंकको नाफामा सुधार देखिएको छ।

पहिलो त्रैमासमा १० वटा वाणिज्य बैंकले १ अर्ब रुपैयाँभन्दा बढी खुद नाफा कमाएका छन्। नाफा आर्जनका आधारमा नबिल बैंक पहिलो स्थानमा रहेको छ।

नबिल बैंकले समीक्षा अवधिमा २ अर्ब ५५ करोड ५१ लाख रुपैयाँ खुद नाफा कमाएको छ। गत आर्थिक वर्षको सोही अवधिमा बैंकको नाफा १ अर्ब ७५ करोड ६९ लाख रुपैयाँ थियो। त्यस्तै, ग्लोबल आइएमई बैंकले २ अर्ब ३१ करोड ३८ लाख रुपैयाँ नाफा आर्जन गर्दै दोस्रो स्थान कायम गरेको छ। गत वर्षको पहिलो त्रैमासमा बैंकले १ अर्ब ८५ करोड ८६ लाख रुपैयाँ नाफा कमाएको थियो।

सरकारी स्वामित्वको राष्ट्रिय वाणिज्य बैंकले पनि नाफामा उल्लेख्य वृद्धि गरेको छ। बैंकले यस वर्षको पहिलो त्रैमासमा १ अर्ब ६४ करोड ९८ लाख रुपैयाँ नाफा कमाएको छ। गत वर्षको सोही अवधिमा बैंकको नाफा ५८ करोड ८७ लाख रुपैयाँ थियो।

१० बैंकको नाफा १ अर्बमाथि

पहिलो त्रैमासमा १ अर्ब रुपैयाँभन्दा बढी नाफा कमाउने बैंकमा नबिल, ग्लोबल आइएमई र राष्ट्रिय वाणिज्य बैंकसँगै एभरेष्ट, प्राइम कमर्सियल, नेपाल इन्भेष्टमेन्ट मेगा, एनएमबि, कृषि विकास, कुमारी र सानिमा बैंक रहेका छन्।

एभरेष्ट बैंकले १ अर्ब २५ करोड २७ लाख, प्राइम कमर्सियल बैंकले १ अर्ब १८ करोड ७६ लाख र नेपाल इन्भेष्टमेन्ट मेगा बैंकले १ अर्ब १८ करोड १४ लाख रुपैयाँ नाफा कमाएका छन्।

यसैगरी, एनएमबि बैंकले १ अर्ब १६ करोड ४२ लाख, कृषि विकास बैंकले १ अर्ब ९ करोड २३ लाख, कुमारी बैंकले १ अर्ब ७ करोड ४५ लाख र सानिमा बैंकले १ अर्ब ५ करोड १४ लाख रुपैयाँ खुद नाफा आर्जन गरेका छन्।

सिटिजन्स बैंक घाटाबाट नाफामा

गत आर्थिक वर्षको पहिलो त्रैमासमा २२ करोड ४ लाख रुपैयाँ नोक्सानी व्यहोरेको सिटिजन्स बैंक यस वर्ष नाफामा फर्किएको छ। बैंकले समीक्षा अवधिमा १० करोड २७ लाख रुपैयाँ खुद नाफा कमाएको छ।

लक्ष्मी सनराइज, प्रभु र सिद्धार्थ बैंकको नाफामा पनि उल्लेख्य वृद्धि भएको छ। लक्ष्मी सनराइज बैंकले ६५ करोड ३३ लाख, प्रभु बैंकले ६४ करोड ७४ लाख र सिद्धार्थ बैंकले ८५ करोड १५ लाख रुपैयाँ नाफा कमाएका छन्।

केही बैंकको नाफामा गिरावट

अधिकांश बैंकको नाफा बढे पनि केही बैंकको नाफामा भने गिरावट आएको छ। हिमालयन बैंकको नाफा गत वर्षको ७० करोड २९ लाखबाट घटेर ६८ करोड ४८ लाख रुपैयाँमा सीमित भएको छ।

त्यस्तै, स्ट्यान्डर्ड चार्टर्ड बैंकको नाफा ६९ करोड ३९ लाखबाट घटेर ६७ करोड १४ लाख र एनएमबि बैंकको नाफा १ अर्ब ३० करोड ८५ लाखबाट घटेर १ अर्ब १६ करोड ४२ लाख रुपैयाँमा झरेको छ।

समग्रमा पहिलो त्रैमासको वित्तीय विवरणले वाणिज्य बैंकहरूको खुद नाफामा सुधारको संकेत देखाए पनि सबै बैंकको नाफा समान रूपमा बढेको छैन। केही बैंक घाटाबाट नाफामा फर्किएका छन् भने केहीको नाफामा सामान्य गिरावट देखिएको छ।